Generations of Te Ataarangi ki roto o Tainui

Emma Te Rina: Nō wai, nō hea tō reo?, ā, i tipu ake koe i roto i te reo Māori, i ako rānei koe i te reo Māori hei reo ‘tuarua’?

Hinemoa Peke-Manawaiti: Kaaore au i tipu i roto i te reo Maaori, eengari i taku whakatipuranga ki Tamaki ki te tonga ki Henderson. I whakaako mai a paapaa raaua ko maamaa i ngaa tikanga Maaori. Tee rongo maatou i te reo i a maatou e tipu ana atu i te ‘haramai ki te kai’, ‘waa moe’, ‘horoi riihi’ eeraa momo tohutohu. Noo tooku pakeketanga 30 ka hui atu au ki te kaupapa o Te Ataarangi ki Tainui ki roto o Kirikiriroa moo te ono maarama - kei konei tonu ahau! Ko te reo me oonaa tikanga teeraa e too mai ana. Kaatahi te kaupapa ataahua ko Te Ataarangi, noo reira noo ooku pouako, noo Te Ataarangi tooku reo.

Kahurangi Peke-King-Minnear: Noo te koohanga reo, te aho matua me tooku whaanau taku reo rangatira. I taku whaanautanga mai ki te ao marama i reira taku reo e tatari ana mooku. He pai ki te whakaako koia tonu taku reo tuatahi. 

Emma: E hia tau koe e whakaako ana i te reo Māori? ā, inahea koe i uru atu ki Te Ataarangi e Kahurangi?

Kahurangi: I taku whai i ngā mahi akoranga ki Te Waananga Aronui o Taamaki Makaurau i timata au i aku mahi kaiaawhina moo te kura poo o Te Kaakano i te tau 2012 ki te 2013. Aa, i taku hokinga atu ki Waikato i whai tuuranga mahi ahau ki Te Waananga o Aotearoa i te tau 2015 hei pouaawhina moo te hootaka o Te Ara Reo Maaori kooeke tuarua ki Mangakootukutuku, ki Raroera i ngaa tau e 4 i whai atu. Ko te whakaaro ia kua noho ahau hei mokopuna i raro i te kaupapa o Te Ataarangi naa runga i te whai o ooku Whaaea i te kaupapa hei aakonga, hei pouwhakaako hoki mo te nuinga o ngaa tau e ora ai ana ahau. Kua whai tuuranga mahi ahau hei kaimahi ki te tari o Te Ataarangi hei aha? Hei whakakaha i te kaupapa kia rangona whaanuitia tonu ki te ao. 

Emma: He aha te take i timata koe ki te ako, ki te whakaako i te reo Māori?

Kahurangi: Ko te reo te take, ko te reo kia rere, ko te reo kia Maaori. Mei kore ko te reo, mei kore hoki ko au. Ko teetehi o aku moemoeaa he whaangai i too taatou reo me ngaa tikanga a kui maa a koro maa ki ngaa uri whakaheke hei oranga whakaoohoooho i te wairua, hei painga mo te tiinana, hei oranga mo te hinengaro.

Emma: Mō te hunga kāre i te mōhio ki Te Ataarangi, he aha te kaupapa o Te Ataarangi?

Hinemoa: I te tau 1979 i timata Te Ataarangi hei kaupapa whakarauora reo, hei kaupapa whaangai i te reo ki ngaa pakeke, ngaa maatua o ngaa tamariki mokopuna o te koohanga reo. Naa Kaaterina Te Heikookoo Mataira raaua ko Ngoingoi Pewhairangi teenei kaupapa i timata. I kite a Whaea Kaaterina i ngaa mokopuna o te koohanga reo e tere mau ana i te reo Maaori heoi kaare he kaupapa tiaki, whakaako raanei i te reo Maaori ki te pakeke. Noo reira i rere te reo Maaori i te koohanga reo ka hoki te tamaiti ki te kaainga kaare e rongo i te reo Maaori e rere ana. Naa konei ka ahu mai teenei kaupapa whakarauora reo, aa, i kaha kookiri a Whaea Kaaterina, a Whaea Petiwaea Manawaiti, a Whaea Nganehu me a raatou tuaakana, tuungaanee hoki i teenei kaupapa ki roto o Kirikiriroa. Me pono te koorero i rata te motu whaanui ki te kaupapa me te rautaki whakaako o Te Ataarangi haaunga i a Waikato [pakaru te kata]. Heoi anoo he tino hoa a Whaea Kaaterina raaua ko Whaea Petiwaea ki Te Arikinui Te Atairangikaahu - ka rata mai Te Arikinui ki ngaa raakau, mea rawa ake ka rata mai a Waikato whaanui tonu! Kaatahi ko Waikato teetehi o ngaa iwi kaha ki te tautoko i Te Ataarangi.

Koia ko Te Ataarangi, he whakakaainga i te reo ki roto i te kaainga moo ngaa tamariki me ngaa maatua, otiraa he whakakaainga i te reo ki te ngaakau o te tangata

Emma: Nō hea te ingoa o Te Ataarangi?

Hinemoa: E ai ki ngaa koorero i ahu mai te ingoa o Te Ataarangi i a kookaa Ngoi Pewhairangi i ngaa whare waananga o roto Ngaati Porou. Naanaa te wairua me ngaa tikanga i uu ki te kaupapa, naa Whaea Kaaterina i mauria mai ngaa raakau me taua rautaki ako i te reo ki Aotearoa mai i Whītī. Naa raaua tahi a kookiri ai Te Ataarangi.

Emma: Whakamārama mai i ngā rākau, he aha tēnei momo rautaki ako i te reo? He aha hoki ngā momo rautaki whakarauora reo o Te Ataarangi?

Hinemoa: Tuatahi ko te whaangai i te reo ki ngaa pakeke, hei kiinaki i te reo e ako ana e ngaa mokopuna o te koohanga reo, kia whakakaainga i te reo. Tuarua, ko te tirohanga whaanui kia rata mai ngaa marae, ngaa hapuu, ngaa iwi o Aotearoa, aa, kia whaangai i te reo ki ngaa uri Maaori kei taawaahi e noho atu ana. I teenei waa tonu e tuu ana ngaa kura o Te Ataarangi ki Te Whenua Moemoeaa, ki Taiwana, ki Hawai’i hoki. Noo reira, eehara i te mea ka noho tangata whenua te reo Maaori ki konei, otiraa te kaupapa o Te Ataarangi, aa, ko te rautaki kia whaangai i te reo Maaori ki te ao whaanui. Tuatoru, ko te tino hiahia kia whakaako i teenei rautaki whakarauora reo ki ngaa moutere o Te Moananui-aa-Kiwa, otiraa ki ngaa iwi taketake o te ao whaanui.

Ko ngaa raakau ngaa tino rangatira, aa, e aahei ana ngaa raakau ki te whakaako i te reo ki te tangata ahakoa te taumata. Ko taa te mahi o te kaiako he aata whaangai i te reo ki te tauira maa te whakatakoto i te raakau, te mahi pikitia, te hanga koorero kia kite, kia rongo, kia whaawhaa, kia whakakoorero i te tauira i te reo Maaori, i te auahatanga o te reo Maaori hoki.. 

Kahurangi: Koorerotia te reo, ahakoa hee mai ahakoa tika, ki te koorero koe ka rongo ki ngaa rerekeetanga. Ko te wawata ia kia tuuwhera ai te ngaakau me te hinengaro ki ngā akoranga kei mua i a koe, maa teeraa ka kite koe he ao anoo kei tua i a koe. He maha ngaa momo rauemi whakaako reo Maaori kei teenei ao kikokiko, ko te tino rauemi ki ahau nei ko te tangata. Ki te whakawhitiwhiti koorero, waananga koorero raanei ka rongo te wairua ka whakaoohooho i te reo kei roto anoo i a koe, e whakapono ana ahau kei too ngaakau too reo. 

Emma: He aha ētehi hua motuhake, ētehi painga kua puta, kua kitea e koe i oo tau hei pouwhakaako i te reo Maaori?

Hinemoa: Ko te mea taumata pea ko te aahei ki te whakawhiti koorero ki aku iraamutu, ki tooku whaanau tae atu ki ngaa mokopuna, me te kite i te ohorere i taa raatou whaea e koorero Maaori ana. Otiraa te whakaako, te whakahoki i aku akoranga  ki aku tauira - he mea nui teeraa, te kite i te puawaitanga o te reo e koorerotia ana e aku tauira.

Kahurangi: He nui ngaa painga i ngaa kura ako i te reo Maaori. Ko teetehi te kitenga o ngaa hua reo i puawai i roto i teena i teena o ngā aakonga i tomo mai ki te kura, ahakoa i rerekee te takune o te tangata i tomo mai ki te kura. Hei te mutunga o te marama tuatahi kua tino mau puu ki te aakonga me te kite i tana hiakai ki too taatou reo rangatira, kua whai oranga anoo maa te whai i tana reo.

Emma: He mea motuhake te oranga o te reo Māori ki te iwi Māori, nā kui mā, nā koro mā i rangatira ai, i motuhake ai tā tāua reo. Ko wai ngā atua, ngā tūpuna, ngā tangata rānei e whakaohooho i a koe ki te whakaako, ki te whakarauora i te reo Māori ia rā, ia rā?

Hinemoa: Kaare e tawhiti aku whakaaro i ooku tuupuna, i ooku maatua i te mea kaare tooku whaea i kite i tooku puawaitanga ki roto i te reo Maaori naa toona matenga ohorere - engari ko tooku paapaa teeraa he kaitautoko i au, i a mātou ana tamariki e whai atu ana i te reo.

Ko nga kaikawe i te kaupapa a Miria Simpson, John Rangihau, Whaea Katerina, Rahera Shortland, taku hoa a Ringiringi Peke-Manawaiti, Tuki Nepe rātou ko tooku kaiako tuatahi a Okeroa Waitai. He nui tonu ngaa pou o te reo Maaori i mua tonu i au e tino whakamiiharo atu ana au.

Kahurangi: I ngeenei rangi ko ngaa atua e rongo nei e au ko ngaa atua o te taiaao, i taku whiikoinga i ngaa ngahere me te whai i te rere o ngaa wai ka rongo i te maariretanga huri noa i a ahau ka whakaaro ake ki ngaa whetuu o Matariki me ngaa hua maha ka ahu mai i a raatou. I taku aahuru moowai ka huri aku whakaaro ki aku tuupuna whaaea me ngaa whakaakoranga kua waihootia e raatou hei rautaki ako mooku i roto i aku haerenga, i teenei waa ka kimokimo aku whatuu ki a Hinemarama/Hina.

Emma: Kua kite tāua i ngā hua o te ako i te reo Māori mai i a tāua pia i Te Pinakitanga ki te reo Kairangi me tā rāua uru totika ki te kaupapa o Te Ataarangi, he aha ngā hua ako kua puta i Te Ataarangi?

Kahurangi: Ko te hiahia ki te ako i ngaa maatauranga kei te kaupapa o Te Ātaarangi, naa te pouako o Te Pīnakitanga taua kai i whaangaia ki a maatou naa runga i tana ngaakaunui ki te kaupapa me tana whakapaukaha mo ngaa tau e maha ki taua kaupapa. I tana whakawhitinga ki te whakaako i Te Pīnakitanga i kawea e ia aana maatauranga whakaako, ko teetehi hua i puawai te wehenga o taua pouwhakaako ki te hoki ki Te Ātaarangi, tokorua o maatou i whai i a ia kia noho ki te puna whakatupu kaiako araa ko Ngaa Punua Kaiaako o Tainui i raro te rohe manaaki o Te Ātaarangi Ki Roto o Tainui. Ko Whaea Okeroa Waitai teeraa, he wahine ngaakau mahaki, he wahine ngaakau pono ki te kaupapa, he wahine marae ia - koia te whakatinanatanga o aua kupu whakarite.

Emma: He kupu āwhina, he kupu tohutohu rānei āu hei whakamanawa i te wahine, i te tangata e hīkoi ana i tēnei ara ki te ako i te reo Māori?

Hinemoa: Kootahi te kupu, whakapono. Whakapono ki a koe anoo me too taeatanga ki te hiikoi i teenei hiikoi, i te mea eehara ko koe anake e hiikoi ana i tēnei hiikoitanga. Ahakoa te uaua o te hiikoi, pai tuu, pai hinga - tuu anoo, whakapono ki a koe anoo, ka taea e koe ahakoa te aha.

Kahurangi: He nui ngaa rauemi kei te ipurangi, kei ngaa pae paapaaho paapori (Social Media) kei roto hoki i ngaa whare pukapuka hei whaangai i too hiakai ki te reo. Kia hoki ki ngaa kupu kei te ngaakau o Te Ātaarangi ‘Kia kore koe e ngaro, taku reo rangatira.

Emma: He kōrero whakakapī āu?

Hinemoa: Naa Whaea Katerina teenei koorero i tuku ki a maatou o Te Ataarangi “ki te kore te tamaiti e rongo i te reo i te kaainga, ki te kore te tamaiti e koorero i te reo i te kaainga - poroporoakitia te reo”

Kahurangi: e kore e tawhiti aku whakaaro, aku mihi ki te Matuanui-i-te-rangi, ki a Kiingi Tuuheitia Pootatou Te Wherowhero te Tuawhiti, ki te hunga, ki ooku tuupuna kua mau ki te kupenga o Taramainuku. Tae rawa atu ki ngaaku kaumaatua, ngaaku whaaea, ngaaku matua me ngaaku hoa piri tata nei te mihi maioha te mihi matakuikui ki a koutou katoa, mei kore ko koutou mei kore pea ko au, aa he aroha mauroa.